老友記投資 宜短不宜長

話說IT部門嘅Danny尋日煞有介事咁搵曉陽，話有個長輩理財嘅問題想請教，但唔知如何入手。

長輩理財問題？莫非遇到遺產分配嘅選擇？曉陽好難幫，問律師可能係一個更好選擇。

原來係Danny爸爸有一筆儲蓄保險即將到期，銀行就提議Danny爸爸再做另一份儲蓄保險，將錢繼續滾存落去。

如果繼續滾存資金，聽落其實都係好事，Danny點解要求助？原來Danny爸爸今年已經75歲，銀行竟然提議佢再做一份20年期嘅儲蓄保險，年均保證回報大約係3厘，最快第6年開始先會有正回報。

若單單睇年均保證回報率，其實並唔差，問題在於年期嘅長度。

如果一個老友記已經75歲，再做一份長達20年嘅儲蓄保險，係咪適合？如果老友記無病無痛，20年後仲可以攞到錢出嚟用，的確唔錯；但如果老友記有咩需要，突然要用錢，就會好麻煩。

曉陽唔係好熟悉儲蓄保險嘅操作，但如果資金一定要鎖死20年，對於投保人嚟講，尤其年紀咁大，未必係一件好事。

同一時間，投保人如果身故，呢一類保險嘅賠償情況，大家都要留意條款，未必會係一個大額數目，有機會只係投保金額再加5%，對家人幫助未必好大。

曉陽就建議，如果Danny爸爸身體尚算健壯，可以考慮一啲短期儲蓄類投資，可能係3至5年，盡量唔好太長。如果想再彈性一啲，可以趁而家息口仍算理想，選擇一年期定存，對自己同屋企人都更有保障。

（本欄逢周四刊登）